絲絲講場：星展員工制服換新Look

絲絲有時都幾羨慕返工着制服嘅朋友，因為年中可以慳番唔少置裝費，如果套制服係靚嘅就當然更好啦！星展香港嘅員工下周一就會穿上新制服，主色玩黑撞紅，都幾好睇喎！

原來集團今次呢批新制服首先喺香港亮相，亞洲其他市場包括新加坡、中國內地、台灣及印尼就會喺今年內陸續登場。

星展以前套制服件恤衫係米色嘅，咪以為今次係求其改吓顏色就算，原來新制服係由新加坡著名設計師Jo Soh設計，靈感源自亞洲嘅多元文化及新亞洲精神，將傳統配合現代元素，仲用咗富東方色彩嘅繩結鈕扣，顯出星展以亞洲為本嘅品牌形象。至於星展豐盛理財嘅同事制服就以黑色為主調，讓各位客戶一眼就認得出兩者不同。

余絲韻