港交所（00388）行政總裁李小加自今年一月中正式上任後，大家只知道佢一年嘅底薪有720萬元，但就唔知佢仲有冇好似認股權或股份之類嘅獎賞。港交所尋日就公布，會撥出9,260萬元用作購入港交所股份，以獎勵合資格僱員，其中900萬元將會獎勵李小加。按港交所昨收市價125.9元計，900萬元約可分得7.14萬股。
不過較為特別嘅係，呢批股份嘅授予期會由過往嘅5年改為3年，咁即係話，由以往每年可授予25%，改為每年可授予50%。
點解會有咁嘅安排呢？無非都係想令到獎勵計劃吸引啲，可以留住員工，唔使佢哋等到頸都長至攞晒啲股份。再者，未來兩、三年對港交所非常關鍵，梗係要出招穩住大局啦！
之不過，咁又會唔會係代表某啲重要嘅員工，只會留喺港交所較短時間呢？心水清人士就話，凡事唔可以睇得咁表面，因為他日港交所可以再有股份獎勵，又或者大幅加人工呢！
9,260萬元嘅撥款額中，其中8,850萬元喺尋日獎授，喺市場上購入股份獎勵97名入選僱員（包括李小加），餘額（即410萬元）就留待日後購入股份獎勵新招聘人員。
余絲韻