市場熱線：聯想值得關注

承接歐美魚缸升勢，亞太區魚缸昨日全面回勇，本地魚缸跟大隊高開，深滬兩魚缸彈逾2%，睇樣反彈未完，短期可頂得兩吓頭槌。恒指午後受祖國魚缸回升所帶動，一度重越10日線，高見20,526點，收報20,422點，升209點。國企指數升1.9%或219點，收報11,729點。

恒指尚未扭轉弱勢

本地魚缸連續三日守在二萬關之上，在此關已建立較強力支持，但暫未脫險境，要睇祖國魚缸是否已成功尋底。現貨場成交額略為升至624億元，但股仔仍然動彈不得，口痕友話較早前深圳有地下錢莊被踢竇，逾百億元人仔本來係支持本地魚缸的北水，北水南流受阻，股仔冇運行。

古勝擔心本地魚缸未擺脫跌勢，主要係重量級大笨象（00005）逆市下跌1%，仍受制於78元阻力，昨收報76.75元，在眾大隻佬中跑尾二。歐元疲憊不堪，思捷（00330）昨日跌2.7%，收報52.3元，弱勢未改。其他大隻佬隨魚缸輾轉上升，QQ（00700）成績表報捷，首季多賺72%，帶動股價昨日升5%，成為大隻佬升幅冧巴溫。

航運股在波羅的海指數創新高下受捧，「貓貓狗狗」（01199）升4.6%。另一重磅股祖國移動（00941）跑輸大市，僅升0.13%，收報75.75元，皆因缸邊友寧買二奶電話（00762），認為二奶電話可搶佔市場份額。為確保紅色錢莊今年內能順利增資，以及農行成功登陸本地魚缸，缸湖傳聞北大人指使匯金增持工行（01398）、建行（00939）及中行（03988），紅色錢莊全面回升，但升勢未算強勁。

智能手機平價搶灘

花旗魚缸的火雞股受捧，其實在下認為本地魚缸的火雞股，同樣可以發揮避險功能，至少唔受祖國調控政策所影響。聯想集團（00992）跟二奶電話合作推出樂Phone，將於下周一推出市場，機價較iPhone平一半，二奶電話以簽約兩年吸引客戶，可以「零機價」出機。受惠於「三網融合」，聯想推出這款智能手機，期望在首年推出市場後，銷量可達100萬部以上。

至於聯想的個人電腦業務，隨着經濟復甦，未來將力谷二三線城市及新興市場，同時加強電腦品種，由價格較大眾化的網絡手提電腦，以至智能性及速度較快的專業用電腦等。由於聯想已開始發展產品多元化，有助減低單一產品的銷售期循環風險。唔少大行都睇好其前景，值得逢低吸納。

古勝