網上購物已成為一種時尚，有統計指出，內地去年淨係網絡購物市場嘅交易額就高達二千五百億元人民幣，比前年有成倍增長，發展潛力絕對唔可以睇小，所以香港貿易發展局繼去年喺北京開咗一間香港設計廊嘅實體店後，都決定搞搞新意思，與內地最大網購平台淘寶網合作，開番間香港設計廊嘅網上店，利用網絡推廣香港品牌。
由於剛啱試行運作，呢個香港設計廊網上店暫時未有好多人知道，不過絲絲上去睇過，設計得真係相當精美，仲有埋本港設計師嘅專訪，令內地消費者可以更加深入了解呢啲品牌背後嘅設計意念。
呢個網上店正式推出時，淘寶網會喺首頁嘅產品分類上特別加添一個「海外市場」類，香港設計廊網就會排喺首位。
由於仍處於起步階段，現時網上店只有二十一個設計師嘅產品，不過貿發局已計劃喺一年內增加至一百個品牌，令內地消費者接觸更多香港設計。要加入呢個網上店，貿發局定落嘅價目表係半年收費八千蚊，三個月收六千蚊，相信可以幫助中小型香港品牌踏出內銷嘅第一步。
余絲韻