新鴻基地產（00016）副主席郭炳江與郭炳聯兩兄弟近日率領一眾高層，兵分兩路走去其他發展商嘅新樓盤參觀，絲絲即刻諗起政府嘅「九招十二式」規管新盤措施，唔通郭氏兄弟係為咗配合政府嘅新政策而「做功課」？
新地老友就叫絲絲唔好咁敏感，皆因喺「九招十二式」推出之前，郭炳江與郭炳聯好多時都會去參觀行家嘅新盤示範單位，透過參考其他發展商嘅長處，補充自己嘅不足。老友仲話，除咗新盤示範單位之外，郭氏兄弟都會親身巡視吓商場及地盤。
絲絲記得，新地有唔少新盤部署開售，好似大角咀形品‧星寓及港島南南灣等，郭氏兄弟突然出擊，唔知係咪同呢個原因有關呢？但無論如何，都印證咗中國人一句說話，就係「力不到不為財」。
余絲韻