絲絲講場：馬凱博向學生送高帽
滙豐銀行嘅慈善基金最近捐咗342萬元畀香港演藝學院，支持中港兩地學生交流計劃及粵劇獎學金計劃等，呢類頒贈支票儀式一般都好悶，不過滙豐銀行香港區CEO馬凱博尋日就好識搞氣氛。
讚學生係香港嘅未來
喺頒贈儀式前，馬凱博先用廣東話講句「大家好」，氹得大家好開心，佢嘅簡短致詞亦不忘介紹獅子銀行，問在場人士：「獅子銀行名稱包含咗兩個城市，除咗香港，另一個係邊個？」有個學生好快就答到係上海，馬凱博好識做咁問邊個答中，話佢可以獲得獎學金，令到學生們不知幾雀躍，到底係咪真嘅就唔知喇！
面對一班年輕中學生，馬凱博乘機讚佢哋係香港嘅未來，對於坐喺前排，有番咁上下成熟嘅嘉賓，馬凱博就形容佢哋係香港嘅昨天，唔知呢班貴賓被形容為過去式有何感受？不過現場所見就充滿笑聲。
薪酬委主席人工捱批
馬凱博如果呢排喺中環總行撞到佢老細──集團行政總裁紀勤，都真係要安慰吓對方。事關近日滙控（00005）高管花紅過高嘅抨擊沒完沒了，繼紀勤嘅80萬英鎊遷港津貼捱轟後，即將擔任滙控董事薪酬委員會主席嘅獨立董事約翰桑頓（John Thornton），亦被質疑每年酬金達104萬英鎊係過高。
雖然滙控辯稱桑頓嘅酬金與其他美國大型銀行類似職位相稱，但滙控股東就擔心咁樣會影響桑頓作為獨立董事嘅獨立性。
余絲韻