絲絲講場：渣打兩巨頭學整撻
中國人有句俗語叫「阿茂整餅」，意思即係冇嗰樣整嗰樣，渣打集團（02888）就當然唔會咁樣，集團行政總裁冼博德（Peter Sands）與香港行政總裁洪丕正（Ben）就轉學整蛋撻，不過呢啲廚房嘢就考起阿Ben，佢仲話整蛋撻仲難過做「賓卡」喎！
訪盲人學校做善事
尋日阿Ben與老闆Peter伉儷以及一班高層，去心光盲人學校探訪，仲同班學生夾手夾腳整蛋撻。阿Ben做銀行大班就做得多，尋日處男下海整蛋撻，唔知佢會唔會整到「杰撻撻」呢？不過做善事嘅嘢就冇計嘅！
唔講唔知，原來Peter從來未食過港式蛋撻，唔知佢會唔會試番吓自己嘅手勢？或者試吓太太整嘅都得喎。渣打話要專注亞洲、非洲及中東市場，香港作為亞洲嘅重點城市，Peter又點可以未食過香港嘅地道小食，睇嚟第時佢再嚟香港，做正經事之餘都要喺香港呢個美食天堂歎番吓先得！
余絲韻