升停板後再大冧
長興化工嘅首季每股盈利其實應該係0.53元，足足少咗差唔多85%，當每股盈利3.51元嘅消息公布後，股價梗係爆升喇，仲一度升停板，之後公司澄清話公布錯咗，股價就大瀉，高低位相差一成有多，成交量多咗五倍幾。
長興化工有關方面就話，今次事件純屬意外，絕對唔係故意咁話，而且之後已依照證交所指示做善後工作，重新上傳第一季嘅財務報表。證交所就話會先罰長興化工3萬元，了解後續動向之後會再作後續處置。
呢次事件唔單止令到散戶中招，見到盈利咁厲害，就連機構投資者亦難幸免，台灣傳聞估計有成22億元「坐艇」添。
余絲韻