最近北京出現咗一間叫國美銳動嘅公司，主要銷售體育用品，就咁睇個名，唔通與上市嗰間國美電器（00493）有關係？冇錯，國美銳動嘅大股東就係黃光裕胞妹黃秀虹，佢持股八成，另外嘅兩成股權就由北京國美電器出資，不過呢間北京國美電器並唔係包括喺上市資產之中。
國美銳動喺北京頤和園附近嘅第一家門店已經開業，兩個月後會開第二家門市，目標喺未來三年之內開設一百家門市，成為國美電器以外嘅另一家大型連鎖銷售企業，註冊資本為五千萬元人民幣。
兩家公司嘅股東都係同一路人馬，當然可以分享資源發展，所以國美電器嘅會員會自動成為銳動嘅會員，而且國美銳動仲有可能利用現有國美電器嘅門店做推廣添。
國美銳動總經理李岩就話，賣體育產品嘅市場比家電大，而且又唔會飽和，利潤率仲高過賣電器。
余絲韻