台灣財政部早前收到封掛號信，點知一打開就見到10萬蚊現金，同埋夾住一張字體工整嘅字條，上面寫住「以前偷，依家還」，寄件人仲以「後悔者」自居。無論當局點樣查，都查唔到係乜水寄嚟，連係男係女都唔知。所以就依法公告等人認領，半年內冇人認頭，啲錢就會充公入庫嘞。
影射欠稅大戶
冇人知道「後悔者」當年發生乜嘢事，依家用咁嘅方法嚟補償，亦好難判斷究竟畀多咗定畀少咗，但就令唔少人感動及佩服。始終係有人良心發現還錢，比起嗰啲有頭有臉，仲欠稅唔肯還嘅大戶，簡直就要拍手讚好。
聽講欠稅唔還嘅人就嚟冇好日子過，當局由五月一日零時開始，就會喺網站將嗰啲欠稅大戶全部現形，等輿論去評吓佢哋有幾多良心。
余絲韻