「賓卡」一年到晚咁勤力幫銀行賺錢，最開心嘅時刻莫過於分花紅，早前中銀香港（02388）公布年度業績時，亦一併公布董事及高層嘅酬金，絲絲第一個梗係留意總裁和廣北有幾多人工，跟住就發現副總裁高迎欣嘅酬金都唔弱，一共有807萬元，而且花紅部分更多過和總81萬元。
掌管企業銀行業務嘅高副總獲派多啲花紅亦係理所當然，因為好多人都知中銀香港去年嘅企業銀行業務做得好出色。
最近絲絲翻查佢哋嘅年報，不經意睇到董事酬金嘅一頁，赫然發現高副總嘅酬金比原先披露嘅數字少咗成182萬元，只係得番626萬元，主要係因為花紅部分由349萬元變為167萬元，造成酬金大降。
無端端少咗咁多錢，如果換轉係絲絲，心裏一定不是味兒。到底係乜嘢原因搞到高副總空歡喜一場？
絲絲探究後得知，原來係當時業績公布有關嘅附表，所顯示嘅數字都係未完成會計流程，年報中嘅數字先至係實數。
余絲韻