內地股市弱過藥煲，一直受打擊樓市的影響，尋日仲傳出有保險資金沽貨，真係雪上加霜。詩詩見內地股市一開又腳軟，港股低開，第一時間以0.061元沽晒華億傳媒（00419）。光大國際（00257）則繼續持有，能夠逆市上升，證明呢隻係好嘢。
航天萬源（01185）股價在0.9元整固一段唔短時間，又到收集時候，不妨買定些少等運到。經過近年多番重組，萬源舊年業績成功扭虧，期內營業額6.63億元，大增2.6倍，盈利7,080萬元。業績反映集團期內的風力發電項目、汽車工業用材料業務及銷售稀土電機與來自電訊設備產品的業務開始步向收成期，上述四項業務以風電業務的營業額達3.46億元最多，超過營業額一半。
萬源去年底批股後，股價曾一度高見1.46元，之後股價反覆回落，最低更跌穿埋批股價。集團目前幾項業務，全部食晒潮流兼受惠於國策，無理由股價表現會咁差。詩詩終於喺大陸線人八到個原因，話說去年底萬源以0.8元批股，市場反應熱烈，因為睇好其前景。但集團唔肯加碼再批，有心人利用手持部分股份質低股價收集，據聞已收得七七八八。只要再有任何利好消息刺激，萬源隨時再展新升浪，值得留意。
詩詩