騰訊（00700）主席馬化騰因公司成功而有「QQ之父」嘅別號，不過原來馬化騰創辦騰訊，係全靠佢父親馬陳術呢位幕後軍師支持，就連「騰訊」呢個名都係由馬陳術所取。
馬陳術本身係內地嘅交通部幹部，及後調任鹽田港，隨着鹽田港喺九十年代末於深圳A股上市，佢擔任鹽田港上市公司董事直至退休。馬陳術近日向《中國證券報》透露，喺馬化騰創立騰訊之初，佢原來負責管理公司帳目，而「騰訊」呢個名亦係由佢所起，其寓意為「萬馬奔騰的信息時代」。
不過馬化騰當時對「騰訊」呢個名其實不太接受，只不過當時所構思嘅其他幾個名字都已被別人註冊，「騰訊」才正式成為公司嘅註冊名字。
回顧騰訊成立之初，除咗馬陳術呢位爸爸外，馬化騰母親原來亦佔非常重要嘅位置，事緣當時成立公司，法人代表要有待業證或退休證才能擔任，結果馬媽媽以退休人士身份出任法人代表，即係騰訊首任董事長，創辦人馬化騰反而變成「接班人」！
余絲韻