股神巴菲特名震天下，除咗投資戰績令人拜服之外，佢對於慈善嘅捐獻亦為人津津樂道，不過股神年事已高，退下來都係遲早嘅事，做佢嘅繼任人相信會背負唔少壓力。
絲絲聽講，股神個仔霍華德‧巴菲特（Howard G.Buffett）將接任做巴郡主席，佢嘅細仔Peter就話，大家唔應該期望Howard有老竇咁厲害嘅投資紀錄，實行為兄弟減吓壓。
Peter認為冇人可以媲美佢老竇嘅戰績，佢仲用一個比喻話，你冇可能要求約翰連儂個仔可以寫番一啲披頭四嘅經典歌曲喎。
對於股神計劃喺百年歸老後將身家捐出，Peter表現得都好認同，佢喺一本自己寫嘅書入面好自豪咁講，佢得到嘅道德以及獨立，比起金錢重要得多。
股神之前已經公開話Howard會係佢嘅繼承人，不過應該唔會牽涉巴郡嘅投資以及日常業務，Howard好可能會出任非執行主席，主要嘅功能係維持巴郡嘅美名及傳統，捍衞巴郡嘅價值。
余絲韻