加入中大新研究所
絲絲聽講呢個全球經濟及金融研究所係中大早前新成立嘅，目的係幫中國經濟體系出謀獻策，依家仲請埋任志剛做傑出研究員，與其他教授一齊研究及培訓人才，佢嘅「同事」包括蒙代爾及另一位諾貝爾獎得主莫理斯，真係粒粒巨星。
睇嚟呢個位都幾符合任志剛一貫嘅退休目標，就係為社會及國家繼續作貢獻，而且繼中國金融學會執行副會長嘅身份以及佢嘅私人博客後，佢又多一個評論金融市場嘅身份及平台。絲絲深明任志剛心繫香港及金融市場，一直都有與大家分享見解，但今次用傑出研究員身份出嚟講嘢，有學術機構做平台，自由度及深入度可能更勝一籌！
余絲韻