絲絲講場：中電股東會Show電動車
中電（00002）尋日舉行股東大會，佢哋近年一直落力推廣環保減排，一班管理層就乘機大晒佢哋嘅「綠色車隊」電動車，主席米高嘉道理最後仲喺一眾記者朋友面前，好風騷咁揸住架電動車返公司總部添！
米高嘉道理帶領揸車
老字號藍籌股中電慣例每年股東會後見吓傳媒，今年除咗記者會仲有新搞作，原來公關一早喺理大嘅會場外面準備3架印有中電標誌嘅電動車，老闆米高嘉道理、首席執行官包立賢及其他管理層影完威水相後就上晒車，喺老闆帶領下齊齊揸返公司總部。
原來包立賢已經試揸咗呢批電動車成個月咁耐，仲試過用嚟載佢3歲大嘅囝囝去踢足球，佢話呢架iMiEV電動車以短途行車為主，好適合香港喎。佢仲話中電為配合香港推廣電動車，會做好基建配套，好似依家全港已經有11個停車場充電站，今年仲會加多10個，並計劃引入電動車快速充電技術，加快電動車喺香港嘅普及性。
余絲韻