絲絲講場：和黃高層減薪好榜樣
喺充滿挑戰嘅經濟環境下，雖然和黃（00013）○九年盈利仍增長12%，但並唔代表包括副主席李澤鉅及董事總經理霍建寧等和黃董事局成員嘅花紅同步上升。和黃嘅年報顯示，○九年和黃董事局整體嘅薪金開支減少1,079萬元，而人稱「打工皇帝」嘅霍大班去年就收少902萬元人工，果真體現與公司共渡時艱嘅精神。
霍大班花紅減898萬
按和黃剛刊發嘅年報，多名執行董事年內所獲嘅花紅或基本薪酬，均較對上一年下降，其中李澤鉅由和黃直接支付嘅總薪金，按年減少4.3%至3,534萬元。霍建寧年內所收取嘅基本薪酬除微降至1,022萬元外，年內所獲嘅花紅亦減少898萬元，至1.11億元；不過埋單計數，霍大班全年人工仍高達1.24億元，呢個數字對一般打工仔嚟講當然係天文數字，即使對於一間二、三線嘅上市公司嚟講，隨時係整間公司嘅全年盈利！
余絲韻