「007」占士邦嘅英雄形象深入民心，無論係八歲細路抑或八十歲阿婆都識佢，絲絲就最鍾意辛康納利扮演嘅占士邦。聽講平保（02318）董事長馬明哲都好欣賞「007」，佢仲話保險從業員都應該學吓占士邦，不過當然唔係因為佢靚仔，係因為「007」好識變通，後面仲有一大班人支援佢，情況就好似平保咁。
占士邦喺戲入面飛天遁地、上山下海，勇破犯罪組織嘅陰謀，佢除咗有神乎其技嘅槍法及敏捷身手，當然唔少得好多先進嘅「架生」，令佢如虎添翼。作為保險經紀，除咗要有專業知識、口才好、有專業態度之外，配套都好重要，馬明哲就話，經紀喺前線負責衝鋒陷陣，後面亦要有一大班人幫手，好似分行後勤部門及其他資訊科技支援。
平保之前就推出咗「ｅ行銷」計劃，即係用電子化服務客戶，經紀帶備手提電腦再輸入客戶資料，就可得出最好嘅保險計劃，認真方便。
馬總嘅一番話聽落又好似幾有道理，不過計絲絲話，佢自己至係「007」，依家平保手執保險、銀行、證券、投資等多項金融業務牌照，真係乜嘢支援都有晒，而且佢仲周圍搵咗咁多猛將加盟負責唔同部門，直頭成支銀河艦隊喇。
余絲韻