絲絲講場：麥傅士見fans有求必應
有「新興市場之父」之稱嘅鄧普頓資產管理執行主席麥博士（Mark Mobius），一向都好肯講意見，所以好受歡迎，尋日佢出席公開演講，吸引咗唔少「粉絲」捧場，包括絲絲在內，有好多「粉絲」見過麥博士嘅真人之後，都大讚佢好人又冇架子。
難得講Talk搞簽名會
麥博士有個花名叫「光頭博士」，形象非常鮮明，佢身為鄧普頓嘅掌舵人，成日要飛去唔同地方考察，好難得佢出席演講，尋日大會就安排咗一個簽名會，順便銷售佢撰寫過嘅書。
麥博士出過好幾本書，絲絲都有買過，但獨欠佢嘅親筆簽名，所以都趁呢個機會索簽。估唔到佢非常細心兼耐心，直情可以用和藹可親嚟形容，好多「粉絲」爭住叫佢簽名和合照，影完相又加問一、兩條問題，佢每樣都有求必應、有問必答，似足黃大仙。
有人向麥博士自我介紹、主動交換卡片，麥博士嘅卡片好快派晒，不過佢非常細心，喺對方卡片嘅角落頭打個「X」符號，話遲啲會電郵番個聯絡方法，非常重視每一位來賓。
絲絲又發覺麥博士都幾鍾意食甜嘢，當絲絲發問時，佢會把握時間喺自助餐枱拎甜品食，短短兩、三條問題，佢已經食咗兩款甜品，而且仲勁落Cream添。
余絲韻