中國人一向奉行四海之內皆兄弟，但如果係來自同一個鄉下，就直頭親上加親，簡直係自己人咁話。好似星展中國個人銀行業務部主管谷祖明，佢與演藝界出晒名嘅谷峰、谷德昭、谷祖琳都係出自同一族譜，認真大有淵源！
谷祖明係星展派去開展中國業務嘅開荒牛之一，與星展中國副董事長兼行政總裁林劉淑英一樣，由香港調任上去足足打滾咗3年。
由於駐紮上海，谷祖明對上海已相當熟路，話知道邊度有好玩好食嘅嘢介紹畀絲絲喎。
佢解釋話，佢哋呢族人嘅名都係跟族譜改嘅，佢與谷祖琳係同輩，大家都係山東人！其實絲絲見到谷祖明真人時，又的確覺得佢輪廓突出，個樣幾有英氣亦幾上鏡，唔做「賓卡」轉行去拍戲都得。
余絲韻