絲絲鍾意去旅行，為咗安全起見都會買定旅行支票，去到目的地至兌現，唔知係咪因為上海世博就快開幕，美國運通話下月會推出人民幣旅行支票。
美國運通尋日公布，由下月十日開始與中行（03988）聯手為前往中國旅遊嘅旅客提供人民幣旅行支票服務，旅客當日起可以喺美國運通位於美國、英國、加拿大、印度、日本、南韓、馬來西亞及新加坡嘅分行買到人民幣旅行支票，嗰啲支票可於中行超過2,000家分行及1,600家合作酒店兌現。
照呢個發展，美國運通應該好睇好大陸嘅旅遊業，運通估計五月至十月舉行嘅世博會吸引350萬海外遊客到訪中國，去年中國接待入境遊客1.26億人次，消費額達397億美元。運通仲引述世界旅業組織嘅數據，話到咗二○一五年，中國將會係全球最多遊客到訪嘅地方。
依家成日講人民幣會升值，絲絲覺得買定啲人民幣旅行支票，可能係一種食正升值條水嘅方法。
余絲韻