絲絲講場：騰訊港股擂台大陸熱爆
中港兩地嘅股民數目與日俱增，為咗令股友有更多「實習」機會，好多券商都會搞模擬交易比賽，等佢哋可以一顯身手，又可以測試吓實力。由騰訊控股（00700）旗下騰訊網、信誠證券及捷利資訊聯合舉辦嘅二○一○港股模擬交易比賽已於本月十二日展開，有個幾得意嘅現象，就係內地嘅參賽者最多，亦最鍾意投資「仙股」，唔知係咪想博大啲回報。
呢個比賽為期一個多月，至五月二十日完結，所有騰訊網嘅QQ用戶都可參加。至昨日為止，暫時領先嘅都係內地參賽者，股票組領先者成功將模擬本金100萬元滾大至201萬元，8個交易日就取得一倍回報；窩輪組領先者更把資金滾大至279萬元。睇嚟參賽者嘅炒股技術超勁，當然最終係咪成績咁好要到最後先知。
信誠證券中國業務總經理蘇祖浩就話，今年比賽分為股票組及窩輪組，各組每名參賽者會有100萬元模擬本金作買賣，勝出者可得到十多萬元嘅現金獎賞，而獲得最高人氣排名嘅參賽者就可獲得iPhone手機。
內地參賽者多 熱炒仙股
今年係騰訊第4年搞港股模擬交易比賽，目的係想加深內地投資者對港股嘅知識，比賽至今已有3萬人參加，參賽者遍布廣東省、香港、台灣及澳門等地，當中以內地參加者佔最多，佢哋為咗推高成績，主要炒仙股博升值。
絲絲上騰訊網睇吓資料，選手用嚟參賽嘅名稱都幾有創意，例如有「王傳福」（比亞迪（01211）主席姓名）及「學習巴菲特」等。至於依家最勁嘅成績，股票組第一位嚟自廣東省，窩輪組第一位就嚟自貴州，但暫時未見香港選手排喺前列位置。
余絲韻