美國證監會指控高盛涉嫌欺詐，歐美股市顯著下跌，詩詩懷疑亞洲呢邊早有春江鴨，否則亞太區股市又點會識得跌定先？港股受美股拖累，預期今日大仆直，恒指支持21,500點在ADR已失守，好彩詩詩持有股仔，所受影響較細，但今日都會考慮要唔要止蝕。
雖然上周五在美國時段，金股商品乜都跌，但詩詩相信金價今年仍然行情看漲，金屬股仍值得睇高一線。中國鎳資源（02889）將於下周二公布業績，上周五逆市靠穩，微升1.2%，估計業績可報佳音。今年以來，在其他主要金屬平均只升1%之際，鎳價卻勁升17%，有助中鎳回復強勁盈利能力，一○年度業績可望扭虧為盈。
就算其盈利表現未能在一時三刻回勇，但睇番其每股NAV高達2.18元，市帳率只有0.74倍，係PB最平金屬股，單係呢一點已夠晒吸引力。至於中鎳去年九月收購的連雲港項目，將會是未來業績的一股強大動力。新廠房今年六月落成後，估計首期每年產能達100萬噸鐵鎳產品，含鎳量約3.2萬噸，以收購時的鎳價推算，連雲港項目每年收益達41.6億元人民幣，係中鎳○九年上半年營業額5.07億元人民幣8倍，只要呢個項目一入帳，中鎳盈利可以三級跳。
詩詩