孖妹缸湖遊：整妝待發論投資

依家Isabella可以封為「美容‧投資顧問」，佢係依紗維紗創辦人及行政總裁，副業賣埋基金及保險，去年成為富通保險嘅「傑出營業員大獎」冠軍及「百萬圓桌會」頂尖會員。佢喺18歲入行做Model，20歲當選港姐季軍，做過電視節目主持，九三至○二年轉投股票行業，做到營業董事，年薪過百萬元後跳去做美容生意。佢講嘢極快，就係喺股票行練番嚟。

撈貨曾中招 睇準出擊

Isabella︰寇鴻萍

高妹︰去年股市大升，點解冇入市？

Isabella︰驚好似九七年咁冧完再冧，九七年尾我撈貨，結果九八年暑假個市再直插，輸得更多，當時行街見到幾十萬元嘅珠寶，150萬元嘅「Benz跑」（平治跑車），諗起自己好輕易咁就輸咗。所以去年都係睇定啲，只夠膽買新興市場股票基金，等到今年二月尾，覺得個市唔會再大跌，先一次過入市，股票組合包括滙控（00005）及國壽（02628），依家有60%至70%係藍籌，其餘係消息股。

莉莉︰二月底計起恒指都升咗6%，你應該賺咗啲喎！

Isabella︰我特別鍾情保險股，買國壽就賺咗約15%，滙控喺80蚊邊買，估計短期內唔會大升，但好過擺錢喺銀行，至於細價股都賺咗20%。其實我鍾意長線多啲，股票㩒個掣就可以放出去，好易做錯決定，所以我投資基金多過買股票。唔計現金，我投資喺物業及美容生意最多，分佔整體投資50%及30%，其餘15%及5%分別投資於基金和股票。

高妹︰你經常中港兩邊走，你睇好內地哪一類行業？

Isabella︰我覺得今年係「資源年」，有利於造車嘅鋼鐵以及石油類股份，所以最近喺基金組合內加多咗世界礦業、能源、俄羅斯、巴西嘅股票基金。除咗資源股，我亦睇好內需股，但內房股就唔好掂，中央要好好㩒住升幅。

莉莉︰今年賺最多應該係你嗰兩層上海樓，怕唔怕中央打壓樓價？

Isabella︰我喺大陸有兩個酒店式物業，一個喺虹橋，4年前買嘅；另一個喺新天地，約兩年前買。短期唔會放住，我相信10年後中國好過依家，人民幣最終會再升值，但香港每日最多只可換兩萬元人民幣，反而買大陸物業可以「財息兼收」。中央干預只係想控制增長步伐，等我哋可以適應到，我認為目前嘅控制好健康。

揀買大陸樓 Cash畀晒

高妹︰其實上海多咗唔少樓係冇人住，唔驚有泡沫？

Isabella︰唔怕，我會「Prepare for the worst」（為最壞嘅情況作好準備），啲樓最好唔做按揭，可以嘅話用Cash畀晒。香港距離內地咁近，兩地嘅資產價格唔可能差得太遠，好似我做護膚品生意，即使品牌走向國際化，都唔能夠因為香港租金貴、人工高而賣貴啲，依家上網咁方便，Click一下就可以上「淘寶網」買嘢。樓價都一樣，兩邊價格始終要接軌，香港樓價咁高，大陸最終會慢慢升上去。

莉莉︰今年會主攻喺邊度買樓？

Isabella︰我想喺香港買多層樓投資，金融海嘯後一直等緊機會，不過香港樓實在好貴，估計之後會跌少少，但唔會大冧。我與兩個細女今年九月可能去北京讀書，今年內希望買到北京朝陽區嘅物業，北京地王平均平過上海，浦東有啲貴到每平方米超過10萬元人民幣，朝陽區每平方米3萬至4萬元人民幣，嗰邊樓價應該仲有得升。

賺錢靠努力 生意為先

高妹︰名人與散戶相比，投資方式有乜唔同？

Isabella︰其實都一樣，大家都咁叻。只要花時間鑽研，熟悉買嘅嘢，就會容易啲賺錢，成功靠努力和運氣，唔努力只會曇花一現。如果唔熟悉或唔了解，就要交畀專家打理。

莉莉︰多唔多娛樂圈中人買基金和保險？

Isabella︰做生意嘅人通常都覺得自己投資醒目，好少買保險和基金。自己做基金和保險銷售，身邊乜嘢類型嘅客都有，但好少係娛樂圈中人，佔比例唔夠1%，娛樂圈嘅人要拍戲、拍電視、唱歌，根本冇時間了解投資，所以應該交畀專家處理，但香港人好得意，唔鍾意假手於人，唔想人哋賺錢，其實基金經理收得你錢，都會盡力做到好表現。

高妹︰你有乜嘢另類投資？

Isabella︰珠寶和鑽石，最貴嘅珠寶係老公送，但呢啲嘢都唔諗住套現。我有64個Birkin手袋，呢款手袋好重，唔可以拎去行街和旅行，但勝在夠大，擺到A4文件，應該會好保值，相信等我啲女再大啲時會賣得好貴。

莉莉︰點樣Keep到自己最靚？

Isabella︰有好嘅睡眠、多飲水、用天然嘅護膚品，內外皮膚就會護理得好。我每日要瞓8至10個鐘，少過呢個鐘數就要喺周末、周日補番，否則會喉嚨痛、唔舒服。一年只買兩次衫，試衫好攰，我會一次過用6位數字價錢買晒成季嘅衫。我食嘢都好清淡，唔食牛、煎炸嘢和零食，亦好少食飯。

高妹︰我知道你公司今個夏季推出最新卸妝水護膚品和去角質啫喱，祝你業務蒸蒸日上！

Isabella︰最想人哋記得我係做美容生意，而唔係開餐廳，希望嚟緊可以成功打入大陸市場。

53%人增加投資抗通脹

今年Isabella儲埋好多彈藥，準備買樓，原來港人都儲埋好多錢，睇番金管局上周公布最新嘅數據，本港銀行體系內嘅客戶存款有上升趨勢，反映仲有好多錢擺喺銀行未拎出嚟。市場普遍預期中港通脹逐步升溫，大家如何應對？會唔會拎啲錢出嚟投資增值？據今期《東方產經》網上民意調查，截至上周末晚上六時，話考慮增加投資嘅佔53%，話會減少債務和減少支出嘅分佔7.8%和32.2%，話唔知道嘅就佔7%。

高妹、莉莉

若有料報畀高妹同莉莉或有嘢問，可電郵money.biz@opg.com.hk