絲絲講場：周文耀出關 落腳數碼港
港交所（00388）前行政總裁周文耀喺今年一月中退休，靜極思動3個月後，佢終於有新動向，尋日被委任為數碼港管理公司非官方董事，任期3年。數碼港管理公司由政府全資擁有，主力負責發展及營運數碼港計劃。
由於周文耀以前係交易所行政總裁，交易所係本港上市公司嘅前線監管機構，今次佢退休3個月後加入非上市公司做董事，外界應該唔會有乜嘢聲音。
其實周文耀今次算係回歸數碼港管理公司，因為佢喺○三至○七年期間已擔任數碼港管理公司董事。眾所周知，佢喺財務管理及資訊科技方面有豐富經驗，出任數碼港董事實在非常適合。
幫國際培幼會做慈善
除咗數碼港管理公司外，周文耀曾經講過喺退休後，會出任一啲慈善團體或專業組織嘅公職，據了解，佢除咗有為母校香港大學幫手之外，亦幫Plan國際培幼會做吓慈善工作。國際培幼會於一九三七年成立，主要幫助發展中國家進行兒童發展計劃，本港著名電影導演張堅庭及立法會議員陳茂波當年亦曾接受該協會嘅幫助，所以絲絲見兩人依家都有協助該會嘅工作。
余絲韻