絲絲講場：置富上市冧巴「次次發」
置富產業信託下個禮拜正式喺香港雙重第一上市，佢哋捐咗100萬元做慈善，攞咗「778」呢個靚冧巴，置富主席趙國雄話，揀呢個冧巴好有意思㗎！
每個數字都有意思
趙國雄叫絲絲用普通話讀「778」呢個冧巴，就知道竅妙之處，原來係代表吉祥諧音「次次發」！趙國雄仲話呢個冧巴對佢哋有另一番意義，皆因「7」係代表置富產業信託今年成立7周年；「孖7」則有雙重嘅意味，寓意基金單位將於香港聯交所及新加坡證券交易所雙重第一上市；而「8」嘅諧音「發」正好與佢哋為投資者帶來可觀回報嘅宗旨不謀而合。
本月二十日就係置富喺香港掛牌嘅日子，公司嘅資產組合包括14項分布於九龍、新界嘅零售物業，截至去年底資產總值約為115億元。趙國雄銷售樓盤時鍾意扮鬼扮馬，好多造型，唔知掛牌嗰日佢會唔會搞吓新意思呢？
余絲韻