絲絲講場:霸王推涼茶Sell正氣

霸王國際(01338)嘅產品一直以中草藥為原材料,佢哋老闆對中草藥自然好熟,最近仲將中草藥多元化,搞完洗頭水再搞飲品,聽講仲會繼續推新產品!

霸王主席陳啟源所講嘅新產品,係本月底推出嘅霸王涼茶,年底又會推出中草藥家居清潔用品。霸王洗頭水代言人係大家好熟悉嘅成龍大哥及王菲,成龍嗰句「動L」令好多人記得霸王呢個品牌,今次佢哋就搵甄子丹做涼茶代言人,似乎對打得嘅明星特別有興趣喎。陳啟源解釋話因為甄子丹形象好正氣,與涼茶產品好夾,況且佢喺內地好有知名度。

租地自種中草藥

除咗原材料之外,原來佢哋覺得銷售平台可以共用,所以諗咗呢啲新產品,日後將個人護理、飲料、家庭護理三大類同步發展。依家霸王嘅產品已賣到去馬來西亞、緬甸及泰國,佢哋仲諗住今年打入汶萊及中東市場,至於內地嘅分銷網絡會擴展到青海及寧夏。

為咗保證有優質嘅中草藥,霸王喺廣東省租用一塊約500畝嘅土地種植中草藥,預計最早明年使用自行種植嘅中草藥生產;另外又計劃租賃一個位於廣州白雲區佔地7.5萬平方米嘅新生產廠房,預計新廠房投入使用後,洗髮護髮產品年生產能力將倍增至約20萬噸。

余絲韻