絲絲講場：海澱業務瞄準大陸富豪

海澱主席韓國龍尋日與絲絲分享呢啲奢侈品嘅體驗，絲絲就覺得大陸嘅物業已變成奢侈品，點解佢哋唔集中搞房地產？殊不知韓生話做地產好攰，於是搞其他奢侈品。

銷售奢侈品有可為

佢哋今次攞到公主遊艇國際公司喺香港嘅獨家分銷權，全因韓生一次個人投資而起。話說佢想買隻遊艇，不惜千里迢迢去外國選購，之後睇中咗公主遊艇嘅產品，係一隻過千萬港元、長62呎、有3間睡房嘅遊艇。佢認為呢盤生意有得做，所以就斟咗個代理權返嚟。

點解咁有信心？韓生話佢會針對喺香港住嘅內地富豪，因為如果買隻遊艇返大陸，打稅可以係幾十個巴仙，運嚟香港就平好多，只要攞番個中港牌，鍾意泊喺香港又得，駛入內地港口又得，加上香港天氣好、海港靚，又唔會冰天雪地，隻遊艇真係全年都用得着；而且公主遊艇暫時未係香港嘅主流遊艇，增長空間可以好大。

賣國產名錶好收成

遊艇生意係咪真係咁大發展，仲要時間引證，至於海澱代理國產名錶依波（EBOHR）及羅西尼（Rossini）就真係做得好出色，呢兩個手錶品牌已成為主要收入來源，佢哋仲打算擴大銷售網，將店舖數目由1,800間增至3,000間。

據講呢兩個品牌佔咗大陸國產錶市場嘅45%，最架勢係呢兩隻牌子已經被世界品牌實驗室（World Brand Laboratory）選為「中國500最具價值品牌」及「亞洲品牌500強」。

韓生話最近買咗瑞士鐘錶品牌豪度，會畀心機湊大佢，然後引入內地市場。

余絲韻