市場熱線：霸王優勢明顯

另一方面，祖國魚缸今日首推股指期貨，缸邊友普遍抱觀望態度，亦打擊了祖國魚缸的人氣。祖國魚缸腳軟，影響了本地魚缸的表現，恒指曾高見22,338點，但下半場升幅收窄，更一倒掉頭回落，最終恒指收報22,157點，僅升36點；國企指數更倒跌28點散場，收報12,813點。

兩巨無霸仍可看好

不過，古勝對後市仍有信心，尤其成交額已轉趨活躍，期貨場亦一直高水，在未出現明顯回落訊號前，在下認為每次回落都係撈貨好機會，只要控制好風險，量力而為，本月跟下月仍大有搵食機會。

兩巨無霸發力撐起本地魚缸，大笨象（00005）升穿保力加通道頂部，收報84.3元，升逾2%。只要花旗派成績表的錢莊股續有老利表現，大笨象仍可向上挑戰86元的下一阻力位。

至於祖國移動（00941）在上周成功突破阻力後，昨日更創下81.2元半年高位，初步目標係去年高位83.8元，若然集團公布首季營運數據報佳音，係推動股價向上的最大動力。中海油（00883）漲3.1%，至14.06元，係大隻佬升幅冧巴溫，孖屐再度憧憬中海油登陸祖國魚缸，獲缸邊友追捧。

「溫情總理」對祖國屋仔市場發表強硬言論，而祖國三月份70大城市樓價同比上升11.7%，創歷史新高，反映北大人或需要推出更多措施壓抑樓價，在政策風險上升下，紅色地主無運行。國土資源部公布今年將較去年大增土地供應至18萬公頃，擺明係為壓抑樓市再出力，紅色地主昨日普遍跌逾2%。

社保基金先後減持中行（03988）及工行（01398），而前者更委託投行進行配股，集資60億美元的擴股增資計劃加快進行，誘使空軍向兩行投下大量沽空銀彈。不過，根據過往經驗，當沽空銀彈持續增加至某水平，唔代表被空襲的對象會插水下跌，一旦冚倉盤湧現，將刺激股價急升。

推新產品擴市佔率

紅色錢莊長線睇好，惟短線或受壓；地主則在打擊樓市政策停止前不宜沾手，數嚟數去只有消費股最穩陣。睇番社會消費品零售總額首季36374億元人仔，同比增長17.9%。

較早前派發成績表的霸王集團（01338），股東溢利同比增長近三成至3.64億元人仔，好明顯係受惠於祖國零售業務隨經濟增長中獲益。預期祖國市場對優質個人衞生用品需求有增無減，霸王將繼續推出新品牌及產品，又或收購相關個人護理產品業務，進一步擴大其市佔率，以及補充現有業務。雖然霸王現價市盈率唔算平，但以其市場優勢及業務增長空間，其股價仍可再上一層樓。

古勝