香港資源（02882）近日新聞都算多，早前獲「四叔」二子李家誠變相入股，尋日又公布送紅股，公司同時公布咗一個冇乜人留意而又幾有意思嘅消息，就係委任龔皓做非執董，咁呢位龔皓又係何許人士？
香港資源嘅公告介紹，佢係華懋集團管理部經理，負責巡視華懋集團旗下所有物業，推廣集團租售物業以及參與華懋喺大陸嘅投資；龔皓喺香港資源嘅年薪33萬元，仲獲授300萬份購股權。
更重要嘅係，龔皓係龔如心嘅姪仔，即係華懋慈善基金負責人龔仁心個仔，龔如心遺產持有嘅幾家上市公司近月股價不時就升幾十個巴仙，市場憧憬嘅無非係華懋會揀中一家做旗艦公司。不過自龔仁心上月以華懋集團主席身份接受訪問時話，若上市有利華懋慈善基金運作，會考慮將華懋集團上市，呢幾家公司又靜咗。
香港資源喺龔如心去世後，華懋透過Chime Corporation向香港資源大股東黃英豪購入一批優先股，而香港資源股價尋日逆市升7.1%，未知未來有冇古仔跟尾。
余絲韻