絲絲講場：梁太求學用功「筆記王」多fans
好多學生上堂時都喜歡抄筆記，原來恒生銀行（00011）副董事長兼行政總裁梁高美懿讀大學時更加係「筆記達人」，手抄筆記仲網羅咗一群忠心「粉絲」，當中更以男同學居多，唔知佢哋係咪真係咁畀心機睇筆記溫習呢？
大學上堂霸頭位
讀書時代嘅梁太一副美人胚子，而且仲好識擺甫士，絲絲以前有幸一睹佢學生模樣，簡直同依家班g模有得揮！梁太話佢讀大學上堂時一定會霸頭位，貪同教授夠近，聽書聽得夠清楚，佢仲會好畀心機抄足筆記。一班同學仔見梁太嘅手抄筆記清楚得嚟內容又夠豐富，紛紛借嚟影印，梁太話見到自己份筆記咁受歡迎，仲有「若干嘅滿足感」呢！
梁太名副其實動靜皆宜，中學時期熱愛打籃球，仲話三分波穿針感覺好過癮！不過依家苦無隊友喎，因為一班阿太朋友個個錫身唔願落場打波，如果同後生嘅妹妹仔打，又話佢哋會撞散自己副骨頭喎，認真搞笑！所以佢依家轉打高爾夫球，貪佢自己打又得，同人比賽又得！
余絲韻