過完復活節，連大市都跟耶穌復活，詩詩假前買入中國木業（00269）表現唔錯，升逾2%。股仔個別發展，資金流入炒重磅股。昨日恒指升近400點，直逼二萬二水平，成交增至891億元，睇嚟升勢有餘未盡，詩詩都要好好把握機會，利用今次升浪撈番筆。
除咗重磅股，創板股昨日表現甚為突出，只要有概念，有成交，夠鑊氣，走勢突破，高追亦無有怕。今日詩詩吼國聯通信（08060），主要係睇中其鐵路概念。
雖然國聯並唔係直接建設鐵路或相關設施，但集團提供車載信息系統，亦能受惠於內地鐵路加快建設，以及國家加速於軌道交通行業的投資。國聯早已發出盈喜，結果於二月公布截至去年十二月底止的首三季業績，股東應佔溢利一如預期按年大升8.04倍。
集團去年簽訂比往年較多的供貨合同，致使期內銷售收入大幅增長；加上期內銷售收入大幅增加，同期的企業經營成本得到合理控制，令溢利大幅上升。今年集團新簽的供貨合同較往年增長數倍，預期下半年會繼續有新簽定單，並可於未來一兩年入帳。另一方面，提供車載信息系統的公司，入門門檻較高，公司有一定競爭優勢，國聯除直接受惠投資的增長，市佔率亦有增長。
詩詩