建行（00939）幾年前收購咗美資行，將其易名為建銀亞洲後，就積極擴張香港版圖，即使喺金融海嘯期間亦一樣照開分行，一年開成十幾間，開咁多分行就梗係要大量請人，所以好多「賓卡」都話建銀亞洲係咁搶人。
據聞建銀亞洲撬人出手好闊綽，其中有啲個案開出嘅溢價可以高到兩成幾，兼幫人賠錢令對方可盡快返工，對打工仔嚟講，反正都係咁做，不如過吓塘擴大人工基數。
為咗廣納人才，建銀亞洲亦以銀行常用嘅人事介紹獎金吸引同事介紹新人加入。聽講獎金有成兩萬蚊，如果能介紹十個、八個，咁就會有十幾廿萬，真係好過返工。當然介紹者要確保自己介紹嘅人可做到過咗試用期，否則都係得個吉。
呢個世界邊有咁大隻蛤乸隨街跳？人哋用得咁高人工請你，就必定要你交足貨。海嘯未發生前，銀行都係用高薪狂撬人，尤其係前線人員，不過幾個月交唔到功課就要起身走人。正所謂日光之下無新事，唔相信依家跳槽嘅人會得到特別優待，總之受人二分四，幾時都要醒醒定定。
（余絲韻）