絲絲講場：國美陳曉：難評黃光裕
如果話世事有時好奇妙，國美（00493）主席兼總裁陳曉應該會好認同，佢尋日被傳媒問到如何評論公司前主席黃光裕，佢好感慨咁話大家既係同事，又係敵人，亦係朋友，關係好複雜，所以好難評論，只能夠講對佢嘅處境好難過囉。
競爭對手變老闆
國美尋日派成績表，傳媒朋友除咗關心公司業績外，仲依然好關注前年喺內地被調查嘅黃光裕，對於兩任國美主席嘅關係，陳曉就話好難評論，皆因佢原來係永樂電器董事長，一手湊大公司嚟香港上市，與黃光裕鬥到頭崩額裂，直到○六年畀國美收購，突然間由老細變打工仔，競爭對手就變咗自己大老闆，又愛又恨，啲關係都咪話唔奇妙。
講番黃光裕單案嘅進展，陳曉話佢其實唔會比外界知得多，而且案件依家已進入司法程序，唔可以亂講嘢。至於黃光裕會唔會返嚟重掌公司，由老細變打工仔到依家又無端端做咗國美話事人嘅陳曉都係嗰句：「好難評論。」
（余絲韻）