中移（00941）去年雖然受到市場環境影響，搞到盈利增長大幅減少，不過仍然年賺一千一百五十二億元人民幣，競爭咁大依然有咁嘅表現，除咗中移嘅品牌夠勁，一班管理層亦應記一功，之不過付出與回報唔一定成正比。
據中移○九年度年報披露，絕大部分管理層去年都冇人工加，董事長王建宙嘅董事袍金、薪金、花紅等主要收入都與前年一樣，主要分別係王總○八年有一筆約八十五萬元嘅認股權公允價值收益，但去年就冇咗呢筆收入，搞到王總去年總收入由三百一十四點六萬元降至二百二十九點八萬元，但少咗嘅都係非現金收益，所以對王總實際嘅購買力應該冇影響（唔計通脹因素）。
絲絲又發現，去年中移管理層中收入唯一大增嘅，係今年初因涉嫌嚴重經濟問題而被免去副董事長兼執行董事職務嘅張春江，佢嘅總收入由一百二十點六萬元升至二百一十點七萬元，不過相信係因為佢喺○八年中先加入中移，所以當年只收一半人工。記得當日中移講明張春江事件唔關公司事，依家仲話畀大家聽有出糧畀張春江，都算幾均真。
（余絲韻）