曾出掌渣打銀行，繼而被力邀出任英國貿易促進及投資部長嘅戴維思一向敢言，曾經係銀行家嘅佢，對「行家」嘅批評真係不留餘地，直指銀行家薪酬與給予股東及社會嘅回報不成比例。唔知英國依家向金融業高層收重稅嘅辣招，係咪戴維思諗出嚟呢？
金融海嘯對渣打嘅影響相對其他金融機構為小，可能與戴維思在任時嘅營商理念有關，講到處理逆境能力，佢絕對有資格向其他銀行機構作批評。
佢倡議銀行金融機構需要改革，坦言銀行管理層高薪厚酬與其向股東嘅回報並不相稱，仲話董事局應加入更多女性以提升動力，企業亦應該喺年報內解釋為何不能增加董事局嘅代表性。
美國及歐洲政府喺金融海嘯後做咗好多限制金融從業員嘅工夫，戴維思好Buy呢個理念，佢認為英國要走出衰退，政府必須主動干預商業，單靠「企業高層向股東負責」呢個口號並唔足夠，當局應借助今次機會發展新工業新技術，由海外引入人才加入政府及私企，英國要走高科技出口道路，而非借助低息環境下嘅內需市場走出經濟谷底！
去年初戴維思被封為有「領地」嘅貴族爵士，兼且離開渣打出任內閣大臣。戴維思仲有冇得做貿易及投資大臣，絕對要睇下月六日英國大選結果，不過即使工黨落敗，大批私人企業一定會向呢位由白高敦一手帶入內閣嘅渣打前主席招手，佢嘅正面思維仲可以大派用場。
（余絲韻）