市場熱線：中航科工好事近

中海油（00883）隨着「油魔」復活，股價勁升6.4%，係冧巴溫升幅大隻佬，油價上升亦帶動商品價格做好，神華（01088）同中鋁（02600）齊齊升逾4%。兩巨無霸反而唔多行，祖國移動（00941）跟大笨象（00005）分別升1.1%及0.7%，後者表現較ADR落後，未能企穩在80元樓上，但古勝相信魚缸要更上一層樓的話，兩巨無霸定要助好友一臂之力，不妨吼吼相關Call輪跟牛仔。

祖國移動闢新財路

講開又講，今日「大泡和」有份吹水報告，睇死祖國移動會繼續落後魚缸，在下又唔係咁睇，反而認為現價係上車好機會。皆因祖移之前入股咗浦發錢莊，個個話佢不務正業，原來祖移係為咗發展「手機錢包」業務，所以搵定間錢莊合作。「手機錢包」同八達通概念一樣，都係電子貨幣一種，只係記憶放咗入手機SIM卡裏頭，今次先以上海世博小試牛刀，之後當然擴大應用範圍，將之普及化。

古勝預計世博唔單止係祖移發展「手機錢包」一塊試刀石，手機短訊用量更會因世博而增加，單係廣告SMS用量大增，祖移自然豬籠入水。港交所（00388）昨日升3.79%，在成交回升下，終跑贏魚缸，古勝預計隨着成交額持續增加，港交所股價可回勇。

咪話古勝馬後炮，在下一早講咗，紅色錢莊在派成績表後會大放異彩，果然在融資計劃一併公布後，所以紅色錢莊都交到功課，在下繼續睇好中行（03988），建行（00939）同工行（01398）有幾勁，看官有目共睹，趁中行仍然落後，快快把握上車機會。

中航科工（02357）將於明日派成績表，表叔線爆料，話呢份成績表可以佳績示人，皆因重組見成效，業績可受惠。集團去年完成業務重組，與控股公司置換資產，成效可於今次份成績表上反映，較早前亦已發出盈利預喜，相信業績相當省鏡。

目前的中航科工由汽車相關業務換入的業務，包括上航電器、蘭航機電及中航光電都是經重組而來。中航科工已虧損三年，今次份成績表唔再見紅，當然對股價有正面刺激，最重要係注資會陸續有來，之前批盪集資，目的除為支付已收購項目外，當然係畀機會芬佬上車。

注資項目陸續有來

聽聞有紅色大行會幫中航科工在業績後搞「路騷」，更會到海外見芬佬，古勝相信今年注資雖未有落實時間表，但呢個肯定係指定動作。經過重組後，中航科工已擺脫持續見紅的汽車業，剩下及新買入的航空產品業務均有錢落袋，已扭轉過往劣勢。缸湖多次傳聞阿媽中航工業將大量注資上市公司逾千億元，即使囝囝唔止中航科工一個，但只獲注入其中十分之一，都講緊成百億資產，中航科工自然水漲船高。

古勝