絲絲講場：屈宏斌范力民齊紮職
滙豐銀行尋日公布經濟研究部人事變動，其中一位主角係廣受傳媒歡迎嘅屈宏斌，因為佢成日有問必答；另一位係廣受女性傳媒注意嘅范力民（Frederic Neumann）。
主管亞太區經研
兩人都升咗做常務總監兼經濟研究亞太區聯席主管，後面個職銜梗係為佢哋而新設。屈宏斌會繼續佢嘅強項，主管大中華地區嘅經濟研究，而范力民就主管其他亞太地區嘅經濟研究。此舉更反映滙豐幾咁重視亞洲區，亦配合集團西向東移嘅策略。
大家對范力民就或者陌生少少，佢喺○五年加入滙豐，係研究亞洲經濟嘅資深經濟師，之前有多年教學經驗，曾經喺不同大學教授經濟，絲絲仲聽聞佢好勤力，好多時周六、日都返工，觀其樣貌應不出四十，真係年輕有為，據講佢依家仲係單身。講講吓差啲唔記得講張之明，佢今次亦被委任為滙豐環球研究中國研究部主管。
余絲韻