詩詩話咗趁季結調整個投資組合，中國仁濟（00648）以0.068元沽出，至於駿新（00091）昨日成交增加，升勢重現，收到料話猛人入股，即管繼續持有。龍昌（00348）開市即以0.47元沽出套利，遲一步沽倒跌收場。
股仔繼續個別發展，中國木業（00269）股價回咗個幾月，成功尋底，近日回復升勢，昨日重上10日及20日線，似再展開升浪。中國木業在一月曾發選擇權股份及認股權證予基金GEM集資逾5億元。GEM肯咁大手筆，當然係睇好其前景，但講到尾要基金肯行使，公司先有錢落袋。
有消息指，接貨基金有意在第二季內悉數行使認股權，認股權行使價0.23元。基金唔係有把握中國木業快有好消息，又點會咁高溢價行使認股權。雖然內地有打壓樓市措施，但地產持續興旺，新樓盤急速增多，木材需求升溫，全年業績有望進一步好轉。
詩詩