幾時見過搭美國內陸機貴過飛去倫敦、巴黎？喺今年嘅五月一日，適逢當日係「股神」巴菲特喺佢家鄉奧馬哈搞年度股東會，屆時定必吸引「粉絲」蜂擁趕至朝聖，唔少美國航空公司已吼準呢個黃金機會，乘機坐地起價。
貴幾多？嗰日由紐約不停站飛去巴黎，要畀1,142美元（約8,908港元），但同一日喺同一起點由美國大陸航空不停站載你去奧馬哈，就盛惠1,433美元（約11,177港元），呢個價錢相當於平日嘅4倍，亦貴過當日去倫敦、羅馬或巴塞隆拿！
為咗疏導擁擠嘅朝聖人潮，大陸航空已喺四月二十九日加設一班，以及喺四月三十日加設三班由紐約出發嘅航班，連航空公司都要為「股神」股東會開路，足見「股神」嘅號召力幾咁巴閉。不過，大陸航空「溫馨提示」股神「粉絲」趁早買定機票好啲，因為大部分機位已被Book咗，剩落嚟嘅機位會仲貴。
「粉絲」之一嘅加州Pabrai投資基金公司創辦人Mohnish Pabrai坦言：「巴黎、倫敦等都係相當沉悶嘅城市，相信五月一日冇地方比起去奧馬哈向巴菲特拎投資錦囊更具意義。」記得去年豬流感肆虐，仍不減「粉絲」朝聖嘅熱情，破紀錄吸引3.5萬人湧到奧馬哈呢個只有43.9萬人嘅城市。
余絲韻