絲絲講場：稻香總裁請纓洗廁所
稻香（00573）主席鍾偉平成日講培訓人才及管理嘅重要性，佢唔係得個講字，原來落實咗一啲「好啃」嘅要求，所有高管都要親自落場，體驗前線員工嘅工作，好似公司ＣＥＯ梁耀進就去過酒樓洗廁所，ＣＦＯ曾穎嘉就喺酒樓做收銀，佢話了解前線員工工作後，對做好公司管理有莫大幫助。絲絲心諗，可能日後會見到鍾主席去酒樓廚房炒菜喎。
前線體驗有助管理
ＣＥＯ梁耀進洗廁所有乜感受？佢笑言洗廁所絕對唔係容易嘅事，兼且發現平日不為意嘅事，例如每間食店廁所依家用唔同嘅清潔用品品牌，日後要統一用同一牌子。鍾偉平補充話，呢個任務係佢哋自發性嘅，透過了解前線不同工種有助日後制訂工作流程，特別係酒樓廁所嘅清潔程度，足以反映管理工作係咪做得好。
稻香啱啱派咗成績表，去年盈利增長逾一成，尋日仲有一件開心事，就係自家產品「稻香誠製」出籠喇！鍾偉平話新產品係預先包裝好嘅冰鮮點心及小食，方便買返屋企隨時有得食。佢仲話今年公司會投資一點三億元，主要喺本港新開八間以及喺內地開三至四間食店，至於喺本港興建嘅食品物流中心就預料明年投產。
余絲韻