雖說能者多勞，多勞多得，不過點都估唔到負責多啲職務，年薪可以暴增成13倍咁多！領匯（00823）主席蘇兆明去年獲委任為大新金融（00440）獨立非執董，大新公布其年薪將由18萬元躍升至250萬元，認真和味！
何以酬金可以激增？大新解釋話蘇兆明自從獲委任後，都係採用獨立身份，不過佢參加大新及附屬公司嘅董事會和董事委員會職務增加，所以要加人工。
睇番大新○八年年報，4位獨立非執董年薪由18萬至60萬元不等，只有執董先至有過百萬年薪。不過大新話，參考番蘇兆明喺大新以外擔當嘅職務及薪酬，董事會覺得加咗佢人工後，應該都係獨立非執董，唔使升佢職。蘇兆明除咗領匯之外，喺永利澳門（01128）亦係獨立非執董，以前亦喺渣打集團（02888）及置地做過。
余絲韻