絲絲講場：任志剛「初返娘家」

退休後嘅任總已經冇用司機，佢平時出入都係自己揸車，絲絲尋日見佢自己坐的士，喺落車處已經有人接佢，既然係返娘家，就梗係唔使好似其他人咁，喺大堂攞張身份證出嚟登記啦！

傳與內地調研團交流

絲絲打聽到有個來自祖國嘅調研團，即係一個非官方嘅智囊團，好想同任總交流吓意見，所以就託佢嘅娘家安排一下，仲借埋地方出嚟添。相信任總今次回娘家，必定有另一番滋味，唔知佢掛唔掛住88樓嘅Office呢？聽聞佢與調研團喺56樓會面，至於傾啲乜，斷估都同金融有關喇！

任總話就話退休，但曝光率好似仲勁過做總裁嗰時，成日都喺媒體上見到佢嘅蹤影，剛啱又喺一份外國報章見到關於佢嘅報道，講到佢最近喺香港高爾夫球會嘅飲嘢聚會上，亦不忘談論金融監管，認為監管者應該多啲關注金融產品嘅風險，而唔係「賓卡」嘅薪酬。

咁又好難怪佢，話晒做咗監管機構主持人成16年咁耐，霎時間都好難改變多年來嘅習慣，而且佢又的確係金融監管嘅專家。佢又話希望社會能認識到自己嘅能力仍在，呢層佢就唔使擔心，因為從來冇人質疑過佢嘅能力。佢嘅談話中都有輕鬆一面，話退休生活好處就係令到自己打高球嘅桿數大減，即係想話自己嘅球技進步神速啦！

余絲韻