為咗支持環保，新地（00016）連續第2年參與世界自然基金會嘅「地球一小時」全球熄燈活動，今次仲發動旗下超過150個物業參與，上周末晚有份熄燈節能嘅商場，包括新鴻基中心、國金中心、中環廣場、APM、新世紀廣場及珀麗灣等，參與數目較去年多一倍，係全港參與數目最多嘅發展商之一。
唔講唔知，新地嘅珀麗灣去年開始已自發性地搞「珀麗熄燈日」，喺每月第3個星期日嘅晚上7點至11點，就會熄咗屋苑部分照明系統，仲鼓勵住戶減少使用家居電器，又喺好多公眾地方使用節能裝置照明，去年就一共節省咗100萬度電，減少660公噸二氧化碳排放量。
新世紀廣場亦引入各種節能及再生能源措施，去年按年減少1,119公噸二氧化碳排放量，耗電量減少5%，措施包括裝太陽能及風力發電裝置供天台照明、廣告燈箱改用LED燈、雨水收集器用於平台淋花等。
余絲韻