中環地少人多，絲絲落去兜一轉閒閒哋都撞到5、6個熟人，所以如果要同人傾密偈、斟生意，似乎都唔係咁安全。中銀人壽執行總裁蔡中虎都係咁講，所以佢依家有飯局都轉移陣地去跑馬地馬會會所，貪嗰度夠靜講嘢夠安全喎。
CF（蔡之暱稱）話跑馬地夠低調，撞到熟人機會微。中銀人壽依家專門銷售保險嘅團隊有150人，今年想擴大至400人，其實自從雷曼「爆煲」後，好多做保險嘅人都留意到中銀人壽，CF話周不時都有其他保險公司嘅人毛遂自薦過檔，當中精算師又有，經紀又有，來自AIA嘅肯定都有！如果CF喺中環高調咁周圍走，隨時又有人走上嚟自我介紹一番呢！
毛遂自薦就冇乜所謂，最怕係商業秘密洩漏出去，你知中環耳目眾多，同得CF傾生意飯局嘅當然係大老闆，好易就畀人認出揣測合作方案，到時真係可大可小！馬會會所話晒都係會員先入得去，人流冇咁複雜，傾生意自然都安樂啲。
今個復活節假期CF會去西藏走番轉，其實喺○八年佢已計劃好出發，點知撞正當地暴動去唔到，希望今年成功踏足西藏，仲會坐青藏鐵路呢！為免有高山症，CF已開始食定藥做足準備，絲絲祝佢有個愉快嘅旅程！
余絲韻