絲絲講場:馮國綸:空氣差跑得辛苦

近排最熱門嘅話題離不開空氣污染及「廿蚊雞」最低時薪,尋日利豐(00494)公布業績舉行記者會,董事總經理馮國綸被問到對於相關問題嘅睇法,威廉馮話空氣差令佢早前跑馬拉松都覺得「挫住挫住」唔多舒服,至於廿蚊時薪,佢就覺得「可以對啲工人好啲」。

前幾日香港空氣污染指數爆燈,有外國記者問威廉馮會唔會同政府做番啲嘢,減少本地排放嘅污染物?威廉馮就回應話企業當然好願意合作,好似自己之前跑半馬拉松都覺得空氣差,跑得好辛苦。香港空氣差,莫講話要留住外國人才,年輕才俊都未必鍾意嚟香港發展啦!

廿蚊時薪「可以好啲」

至於廿蚊時薪係咪真係合理,威廉馮話自己覺得「可以對啲工人好啲」。講到員工,今次營運成本下降,佢哋被問到係咪裁過員?總裁樂裕民話係自然流失,然後喺成本較平嘅地方請番,不過公司同時亦有將部分業務喺紐約及倫敦等高成本地區遷嚟香港,再提供培訓畀香港員工。

余絲韻