香港資源（02882）早前宣布，用現金加股份喺「四叔」乖仔李家誠以及劉旺枝手上收購埋中國金銀餘下40%股權，香港資源執行董事許浩明尋日就話，劉旺枝遲啲會加入香港資源董事會，不過李家誠就唔使喇，因為佢嘅岳丈大人徐傳順已經係董事會成員，相信可以代表埋佢㗎喇。
中國金銀主要嘅資產就係金至尊，依家金至尊喺全國有125家加盟店、108家自營店，喺香港同澳門分別有7家及2家分店。許浩明話希望遲啲可以靠香港資源做融資平台，發展金至尊嘅業務，未來亦可能會收購其他資產，包括黃金銷售網絡。
完成中國金銀嘅交易後，李家誠就會持有香港資源3.09%股權，即係5,558萬股，持股仲多過外父徐傳順嘅0.06%，亦多過老竇李兆基嘅4,000萬股，照道理李家誠都應該睇緊啲投資，不過有外父幫手睇住，相信佢應該都唔使親自出手。
不過金至尊嘅重組仲未完成，等佢復牌同埋中國金銀正式成功收購之後，中國金銀就要按成本價將30%金至尊股份賣畀劉旺枝，到時香港資源及劉旺枝就會各自持有金至尊52.5%及22.5%股權。
余絲韻