道指再創高位，但對港股刺激不大，北大人隨時有行動，炒友寧可靠邊站，大市持續淡靜，暫時市場好似仲未搵到爆發點。企業續派成績表，當中不乏業績標青者，可惜市場上知音人少，股價上得益唔大。大價股唔多掂，啲對沖基金去晒炒股仔，近幾周每日都有驚喜股炒吓，總算為淡靜嘅股市帶來少少樂趣。
內地房產市場龐大，有錢途下吸引水務地產集團（02349）轉型大搞，水務地產幕後人士絕對唔簡單，既能引入中行（03988）旗下中銀國際增持至一成股權，亦有「女股神」劉央嘅西京投資持股逾7%，近期阿爺要整頓央企嘅地產業務，市場估計將演變成「國退民進」，相信應該有助水務地產進一步擴展業務，股價於0.15元橫行收集咗成半年，近兩日見到啲買盤好積極，成交配合晒，似足開車格，一於博佢上試0.27元，止蝕就定0.13元。
古晨