「龐氏騙案」主犯馬多夫去年被判監150年，有美國報章話，3個月前馬多夫喺獄中被擁有柔道黑帶嘅監犯打傷，惟有調遷至醫療中心避吓風頭。另有監犯透露，馬多夫喺獄內與「室友」交談亦不時畀投資貼士，真係坐監都不忘投資本色！
根據剛從美國Butner監獄放監出嚟嘅人士透露，喺該監獄服刑嘅馬多夫早前被一名毒犯打傷，傷勢仲幾嚴重，不但鼻骨及胸骨被打斷，個頭同塊面亦被打傷，需要送去醫院醫治。馬多夫被打據悉係涉及金錢糾紛，打人者聲稱馬多夫欠佢錢，唔知佢以前係咪墮入咗馬多夫騙局。監獄發言人當然否認打人事件，仲話兩個人住唔同嘅監倉，監倉晚上亦會上鎖。
馬多夫已坐監8個幾月，據講有位對「龐氏騙案」規模深感折服嘅監犯，曾經喺獄中嘅圖書館向馬多夫討教投資建議，馬多夫提議佢將啲錢放喺標普500指數基金，同時要避免炒即日鮮，話即日鮮只適合好似佢咁擁有數百萬美元嘅人。呢個投資建議有冇執行就唔知，絲絲淨係知道馬多夫曾令投資者損失超過200億美元！
余絲韻