李寧（02331）近年積極收購其他品牌，除紅雙喜及凱勝（Kason）外，去年新加一個成員，取得樂途（Lotto）品牌二十年獨家特許權。絲絲聽朋友講，為咗打響樂途品牌，李寧今次棄用體育明星做代言人，改為贊助內地女明星徐靜蕾主演嘅電影，戲內徐靜蕾會穿上樂途嘅運動衫褲，以達宣傳之效。
李寧首席執行官兼總裁張志勇話，徐靜蕾係內地著名女明星，而且佢喺網上寫「博客」好受網民歡迎，今次贊助呢齣電影，可提升品牌嘅影響力及知名度。
佢又硬銷話樂途係時尚休閒運動衫品牌，好適合徐靜蕾喺電影中嘅時尚女性角色。
李寧早前宣傳凱勝品牌羽毛球時，搵咗林丹做代言人，今次打破傳統，贊助電影明星，可能與樂途品牌定位有關，而且喺外國好流行呢個宣傳方法，即喺電影中出現不同商品，從而提高商品嘅知名度。
余絲韻